Vonbrigðarlið Bestu deildarinnar

Í markinu er Árni Snær Ólafsson sem lagði hanskana á hilluna eftir tímabil.

Ívar Örn Árnason er meðal þriggja varnarmanna en hann var keyptur til Breiðabliks dýrum dómi frá KA fyrir mót. Hólmar Örn Eyjólfsson er eini fulltrúi Vals í liðinu og þá var heimkoma Ara Leifssonar gleymanleg.

Djúpur á miðju er Guðmundur Þórarinsson sem kom ekki í deildina með sama hvelli og búist var við. Með honum djúpur á miðju er Samúel Kári Friðjónsson sem var keyptur til Vals frá Stjörnunni fyrir háa fjárhæð snemma móts.

Þar örlítið fyrir framan er Framarinn Simon Tibbling. Svíinn var í liði tímabilsins á síðasta ári en meiðsli settu strik í reikninginn á nýloknu tímabili.

Á vinstri kanti er Birnir Snær Ingason sem gekk í raðir Stjörnunnar síðasta vetur. Hafandi verið einn skemmtilegasti leikmaður deildarinnar síðustu ár náði hann ekki sama takti í Garðabænum í sumar.

Hægra megin er Danijel Dejan Djuric sem var keyptur fyrir metfé til KA frá króatíska félaginu NK Istra rétt fyrir mót. Danijel fann aldrei fjöl sína og náði ekki að koma sér á blað í deildinni.

Vuk Oskar Dimitrijevic er þar fyrir framan. Hann var meðal bestu leikmanna Fram á síðasta tímabili en hann skoraði aðeins þrjú mörk í ár þrátt fyrir að spila 26 leiki.

Árni Vilhjálmsson leiðir línuna en hann náði ekki að rétta afleitt gengi Stjörnunnar við og skoraði hann aðeins eitt mark fyrir liðið á tímabilinu.

Þjálfarinn er Jökull Elísabetarson en Stjörnunni var spáð 3. sæti fyrir mót en hann var látinn fara eftir tíu umferðir þegar liðið sat í 9. sæti með tíu stig.