Jökull Elísabetarson, þjálfari Stjörnunnar.
Stjarnan fagnar marki á síðasta tímabili.
Jökull er að fara inn í sitt þriðja tímabil sem þjálfari Stjörnunnar.
„Það er bara flott, ágætt að menn hafi skoðun og trú á liðinu," segir Jökull Elísabetarson, þjálfari Stjörnunnar, um spá Fótbolta.net fyrir komandi tímabil í Bestu deildinni. Stjörnunni er spáð 3. sæti fyrir tímabilið.
„Ég held að það sé ekki auðvelt að átta sig nákvæmlega hvar öll liðin standa akkúrat núna en finnst þetta eðlileg spá um okkur."
„Ég held að það sé ekki auðvelt að átta sig nákvæmlega hvar öll liðin standa akkúrat núna en finnst þetta eðlileg spá um okkur."
Mjög ánægður með hópinn
Jökull segir að það hafi gengið vel í vetur og það hafi verið stígandi í liðinu.
„Það hefur gengið vel, það hefur verið stígandi í gegnum veturinn og takturinn í liðinu er mjög góður. Liðið hefur bætt sig og við höfum spilað nokkra mjög góða leiki. Okkur líður mjög vel með þann stað sem liðið er á," segir Jökull sem er jafnframt ánægður með leikmannahópinn eins og hann er núna.
„Ég er mjög ánægður með leikmannahópinn. Við erum ekki að skoða styrkingu fyrir mót, þó það sé auðvitað aldrei hægt að útiloka neitt en það væri ótrúlegt ef það myndi gerast. Hópurinn er sterkur og samheldinn og stemningin frábær."
Gerir okkur að sterkara liði í dag
Stjarnan endaði í 3. sæti á síðasta tímabili og segir Jökull að síðasta sumar hafi verið áhugavert.
„Síðasta tímabil var bara áhugavert og á köflum svolítið ólíkt okkur inni á vellinum," segir Jökull. „Árangurinn var mjög góður og lærdómurinn af síðasta tímabili er mikill og gerir okkur að sterkara liði í dag."
Hvernig eru markmiðin fyrir komandi sumar?
„Stutta, einfalda svarið er að við ætlum að berjast um allt sem er í boði. Ofan á það þá höldum við sterkt í það sem hefur einkennt okkar hugsunarhátt sem er að vinna agað að því að verða betri sem einstaklingar og sem lið á öllum sviðum."
„Liðið mun spila af ástríðu í sumar og mun gera allt sem það getur til að kveikja í stuðningsfólkinu okkar. Það verður alvöru stemmning á Samsung vellinum og ef okkur tekst að kveikja í fólkinu okkar þá verður þetta eftirminnilegt ár í Garðabæ!" sagði Jökull að lokum.
