Spá þjálfara og fyrirliða fyrir Lengjudeildina: 2. sæti

Spáin:
1. ?
2. Keflavík, 217 stig
3. HK, 204 stig
4. Þróttur R., 166 stig
5. Þór, 152 stig
6. Njarðvík, 136 stig
7. ÍR, 112 stig
8. Grindavík, 101 stig
9. Leiknir R., 100 stig
10. Fjölnir, 82 stig
11. Selfoss, 49 stig
12. Völsungur, 24 stig

2. Keflavík
Í öðru sæti í spánni er Keflavík, liðið sem þurfti að bíta í það súra epli að tapa í umspilinu um sæti í Bestu deildinni í fyrra. Þeir fóru á Laugardalsvöll og töpuðu þar gegn Aftureldingu í lokuðum leik, og taka því annað tímabil í Lengjudeildinni. Síðasta sumar byrjaði með látum fyrir Keflavík þar sem þeir slógu verðandi Íslandsmeistara Breiðabliks út úr Mjólkurbikarnum, en þeir byrjuðu deildina ekki af eins miklum krafti - voru frekar lengi í gang þar. Þeir voru til að mynda í níunda sæti þegar deildin var hálfnuð. En þeir léku mjög vel seinni hlutann og voru aðeins einu stigi frá því að vinna deildina. Keflavík er félag sem á að vera í efstu deild og spurning hvort þetta gangi hjá þeim í sumar.

Þjálfarinn: Haraldur Freyr Guðmundsson er að fara inn í sitt annað heila tímabil sem þjálfari Keflavíkur. Hann tók við liðinu undir lok tímabilsins 2023 þegar Keflavík féll úr Bestu deildinni. Haraldur var aðstoðarmaður Sigurðar Ragnars Eyjólfssonar með Keflavíkurliðið þar áður en auk þess fyrrum fyrirliði Keflavíkur og þá er hann fyrrum þjálfari Reynis í Sandgerði þar sem hann gerði fína hluti. Það rennur dökkblátt blóð í æðum Haraldar og er hann mjög vinsæll hjá félaginu eftir allt sem hann hefur gert fyrir það. Núna er næsta verkefni að koma liðinu upp um deild.

Álit Badda
Baldvin Már Borgarsson, þjálfari Árbæjar, er sérfræðingur Fótbolta.net fyrir Lengjudeildina. Hann rýnir í öll liðin fyrir tímabilið sem er framundan.

Er enn sterkara í ár
„Keflvíkingar koma á góðu róli inn í mótið, liðið var flott í fyrra og er enn sterkara í ár."

„Stemningin hefur farið vaxandi í kringum liðið og eru margir heimastrákar að spila."

„Keflvíkingar munu vera í hörku baráttu um beint sæti í efstu deild í sumar."

Leiðin úr Lengjunni er hlaðvarpsþáttur tileinkaður næst efstu deild karla í fótbolta. Þáttarstjórnendur eru Stefán Marteinn Ólafsson, Sverrir Örn Einarsson og Sölvi Haraldsson. Þeir velja tvo lykilmenn og einn sem gaman verður að fylgjast með úr hverju liði í Lengjudeildinni.

Lykilmenn: Sindri Kristinn Ólafsson og Stefan Alexander Ljubicic
Lykilmenn: Keflavíkurliðið er eitt best skipaða lið deildarinnar á pappír og á að gera atlögu að því að fara beint upp. Til þess að það geti raungerst eru þó ákveðnir leikmenn sem verða að stíga upp og eiga gott tímabil. Sindri Kristinn Ólafsson sem fengin var heim til að verja mark Keflavíkur í meiðslum Ásgeirs Orra Magnússonar er einn af þeim. Hann hefur átt sínar bestu stundir í búningi Keflavíkur og vonast þeir til að Sindri sýni gamalkunna takta í markinu og verði besti markvörður deildarinnar. Nacho Heras þarf líka að eiga gott tímabil og binda saman varnarlínuna. Keflvíkingar binda svo miklar vonir við að Stefan Alexander Ljubicic finni markaskóna fljótt eftir að hann snýr til baka úr meiðslum. Stefán var mjög heitur fyrir framan markið í vetur áður en hann meiddist og skoraði meðal annars sjö mörk í fjórum leikjum í Lengjubikarnum.

Gaman að fylgjast með: Gabríel Aron Sævarsson
Gabríel hefur verið að spila nokkuð í vor í fjarveru Stefans í framlínu Keflavíkur. Þótt hans megin hlutverk í sumar verði eflaust að styðja við Stefan í framlínu liðsins binda Keflvíkingar vonir við hann. Hann hefur sýnt það í leikjum liðsins í Mjólkurbikarnum í vor að það búa mörk í honum og nái hann góðum takti snemma gæti sumarið orðið gefandi fyrir leikmanninn unga. Keflvíkingar eru ágætlega settir með unga leikmenn og í hægri bakverðinum er hinn 21 árs Axel Ingi Jóhannesson fastamaður. Hefur tekið stórstigum framförum á síðustu árum og er í dag einn allra mest spennandi bakvörður deildarinnar ef ekki hreinlega landsins.

Komnir:
Stefan Alexander Ljubicic frá Svíþjóð
Marin Mudrazija frá Kósovó
Sindri Kristinn Ólafsson frá FH
Hreggviður Hermannsson frá Njarðvík
Eiður Orri Ragnarsson frá KFA
Mihajlo Rajakovac frá Ítalíu
Muhamed Alghoul frá Króatíu
Marin Brigic frá Króatíu
Björn Bogi Guðnason

Farnir:
Sami Kamel til Noregs
Ásgeir Helgi Orrason í Breiðablik (var á láni)
Mihael Mladen til Króatíu
Rúnar Ingi Eysteinsson í Þrótt Vogum (á láni)
Óliver Andri Einarsson í ÍR
Sigurður Orri Ingimarsson í ÍR
Oleksii Kovtun til Austurríkis
Mamadou Diaw

Fyrstu þrír leikir Keflavíkur:
2. maí, Fjölnir - Keflavík (Egilshöll)
9. maí, Keflavík - Þróttur R. (HS Orku völlurinn)
18. maí, Þór - Keflavík (Boginn)