Spáin:
1. ?
2. ?
3. ?
4. ?
5. Þór, 152 stig
6. Njarðvík, 136 stig
7. ÍR, 112 stig
8. Grindavík, 101 stig
9. Leiknir R., 100 stig
10. Fjölnir, 82 stig
11. Selfoss, 49 stig
12. Völsungur, 24 stig

5. Þór
Síðasta sumar var svo sannarlega vonbrigðasumar fyrir Þórsara. Þeir fengu Birki Heimisson heim um veturinn og Aron Einar Gunnarsson, landsliðsfyrirliði til margra ára, var líka kynntur sem nýr leikmaður félagsins með prompi og prakt fyrir tímabilið. Sigurður Heiðar Höskuldsson tók við liðinu og það var mikil stemning í Þorpinu fyrir tímabilinu. En það gekk ekki alveg eins og reiknað hafði verið með. Þór var spáð öðru sæti fyrir mót en þeir náðu aldrei neinum takti og enduðu að lokum í tíunda sæti deildarinnar. Það er ekki alveg eins mikil trú á liðinu og í fyrra, en trúin er samt til staðar og ef þessi spá rætist, þá fer liðið í umspil. Það væru Þórsarar eflaust sáttir með og hlýtur það að vera markmið þeirra að enda á meðal fimm efstu eftir vonbrigðasumar í fyrra.

Þjálfarinn: Sigurður Heiðar Höskuldsson, Siggi Höskulds, tók við Þór fyrir síðasta tímabil. Þórsarar lögðu mikið á sig til að fá Sigga Höskulds í Þorpið og það tókst hjá þeim. Hann var þeirra maður. Siggi verður fertugur í sumar en hann var aðstoðarþjálfari hjá Val áður en hann tók við Þór. Siggi á það á ferilskránni að hafa komið liði upp úr Lengjudeildinni en hann gerði það með Leikni en hann gerði frábæra hluti í Breiðholtinu á sínum tíma og er þar dáður og dýrkaður. Núna er hann með það verkefni að koma Þór aftur upp í deild þeirra bestu eftir langa fjarveru og verður spennandi að sjá hvort honum takist það jafnvel í sumar.

Álit Badda
Baldvin Már Borgarsson, þjálfari Árbæjar, er sérfræðingur Fótbolta.net fyrir Lengjudeildina. Hann rýnir í öll liðin fyrir tímabilið sem er framundan.

Mynd: Fótbolti.net - Hafliði Breiðfjörð

Mikil stemning í kringum Þórsliðið að venju
„Þórsarar eru með mikið breytt en spennandi lið. Höskarinn hefur fengið að móta liðið í rúmt ár núna og er búinn að segja upp þessum ömurlega grasvelli sem ég tel mikið heillaskref fyrir Þór."

„Farþegar sem vildu varla spila fengu að fjúka og liðið styrkt með sterkum leikmönnum, það er vissulega blóðtaka að missa Aron Einar og Birki Heimis en liðið í ár virkar á mig heilsteyptara en í fyrra."

„Það er mikil stemning í kringum Þórsliðið að venju og stefna þeir klárlega á að komast í umspilið og þeir hafa alla burði til þess."

Leiðin úr Lengjunni er hlaðvarpsþáttur tileinkaður næst efstu deild karla í fótbolta. Þáttarstjórnendur eru Stefán Marteinn Ólafsson, Sverrir Örn Einarsson og Sölvi Haraldsson. Þeir velja tvo lykilmenn og einn sem gaman verður að fylgjast með úr hverju liði í Lengjudeildinni.

Lykilmenn: Rafael Victor og Ibrahima Balde
Rafael Victor hefur sýnt það bæði með Þrótti Reykjavík og Njarðvík að hann getur vel skorað í þessari deild. Er stór og sterkur framherji sem tekur mikið til sín. Fann sig ekki alveg á síðasta tímabili en það eru miklar vonir bundnar við að í sumar springi hann út með Þór. Á sínum degi eru ekki margir framherjar sem standast honum snúninginn og það er það sem Þór þarf á að halda í sumar að hann hitti oftar á daginn sinn. Það kom svolítið á óvart að Vestri skyldi ekki hafa haldið Ibrahima Balde en þetta er alvöru stykki á miðjuna hjá Þór. Þeir sem hafa fylgst með Vestra síðustu ár vita hvaða kraft hann mun koma með inn á miðsvæðið hjá Þór. Er með reynslu úr efstu deild frá síðasta tímabili auk þess að hafa farið upp með Vestra árið áður. Mikilvægt að fá mann með þá reynslu inn í hópinn.

Gaman að fylgjast með: Aron Ingi Magnússon
Á sínum degi er þetta hörkuleikmaður. Miðjumaður sem prófaði Ítalska skólann í Venezia áður en hann snéri svo aftur í Þorpið. Það verður mikilvægt fyrir Þór að hann verði í stuði í sumar og haldi stuðinu gangandi á miðjunni. Ungur og virkilega spennandi leikmaður.

Komnir:
Yann Emmanuel Affi frá BATE
Ibrahima Balde frá Vestra
Clément Bayiha frá Kanada
Franko Lalic frá Dalvík/Reyni
Juan Guardia frá Völsungi
Orri Sigurjónsson frá Fram
Víðir Jökull Valdimarsson frá KH
Pétur Orri Arnarson frá Kormáki/Hvöt (var á láni)

Farnir:
Aron Einar Gunnarsson til Katar
Birkir Heimisson í Val
Auðunn Ingi Valtýsson til Dalvíkur/Reynis
Marc Sörensen til Danmerkur
Aron Kristófer Lárusson í HK
Alexander Már Þorláksson
Árni Elvar Árnason til Fjölnis
Birgir Ómar Hlynsson til ÍBV á láni
Bjarki Þór Viðarsson í Magna
Elmar Þór Jónsson
Jón Jökull Hjaltason til Danmerkur (var á láni hjá Þrótti V.)