Víðir vann þriggja marka sigur gegn Fjarðabyggð um liðna helgi sem gefur liðinu smá andrými í baráttunni í neðri hluta 2. deildar. Edon Osmani var maður leiksins og skoraði hann þrennu.

Edon var fyrir frammistöðu sína valinn Ice-leikmaður umferðarinnar í 2. deild. Það er hlaðvarpsþátturinn Ástríðan sem velur leikmann umferðarinnar. Hlusta má á nýjasta þáttinn hér neðst í fréttinni.

Edon hefur skorað fjögur mörk í tíu leikjum í sumar. Hann er fæddur árið 2000 og er hann að láni frá Keflavík. Edon ólst upp í Garðinum og spilaði í yngri flokkum Víðis áður en hann skipti yfir til Keflavíkur árið 2011.

„Valið er sanngjarnt. Hann skorar þrennu fyrir lið sem er búið að ströggla og þessi þrjú mörk skila þeim þremur stigum," sagði Alexander Már Þorláksson sem var gestur þáttarins.

„Osmani hefur verið öflugur hjá Víði í sumar - virkilega vel að þessu kominn," sagði Sverrir Mar Smárason.