Lestu um leikinn: HK 0 -  2 Breiðablik


Úr viðtalinu við Stöð 2 Sport
Ómar Ingi sást eftir leik ræða við Ívar Orra Kristjánsson dómara leiksins. Hann sagði eftirfarandi við Andra Má Eggertsson á Stöð 2 Sport:

„Mér fannst við lenda ósanngjarnt undir. Markið átti aldrei að standa og það sjá það allir. Boltinn var á hreyfingu þegar aukaspyrnan er tekin. Það sáu það allir hjá mér en við áttum að gera betur í að stoppa það. Þetta er bara ógeðslega lélegt. Það er ekki eins og dómarinn hafi verið lengst í burtu, þeir eru báðir, Ívar og Elli, nálægt þessu. Það var ógeðslega dýrt að fá þetta mark á sig rétt fyrir hálfleik. Ömurlegt, þessi ákvörðun og hvernig hann svaraði okkur. Ég er bara sammála því ser Arnar Gunnlaugsson sagði um hann fyrir ári," sagði Ómar við Stöð 2 Sport. Það sem Arnar Gunnlaugsson sagði um Ívar Orra eftir leikinn gegn Breiðabliki á Kópavogsvelli má nálgast hér.

Ómar var spurður hvort hann hefði fengið einhverjar útskýringar frá dómara leiksins.

„Ég fór og var alveg reiður en ekki dónalegur. Það endaði með því að mér var sagt að drulla mér í burtu og grjóthalda kjafti. Ég held að það þýði ekkert að ræða við hann frekar en venjulega."

Ómar var spurður hvað honum fyndist um slík ummæli.

„Ég fengi rautt spjald ef ég segði þetta. Það er alveg á hreinu. Svo eru menn að gera svona mistök, ég er ekki að segja að við hefðum unnið leikinn, en þetta breytti klárlega leiknum. Hann ber ábyrgð á þessari ákvörðun og segist bera ábyrgð en ég veit ekki hvernig hann ber ábyrgð á henni. Ég get ekki ímyndað mér það. Þetta breytti leiknum og þeir komu inn í hálfleik og voru með forystu sem að gerði þeim kleyft að breyta um upplegg og leyft okkur að vera aðeins með boltann. Við verðum að sækja og [þeir] skora í rauninni seinna markið upp frá því. Þannig að þetta er bara ógeðslega fúlt að svona ógeðslega auðveld ákvörðun fari fram hjá honum og að hann geti ekki einu sinni drullast til að viðurkenna það að þetta hafi verið mistök. Það þarf að svara með hroka og stælum," sagði Ómar í viðtalinu við Stöð 2 Sport.

Fannst hann alls ekki verðskulda svarið frá Ívari
Fótbolti.net ræddi við Ómar Inga í dag og spurði hann nánar út í umrætt atvik.

„Mér finnst þetta mjög óeðlilegt. Ég tel mig hafa reynt að leggja það í vana minn að vera ekki mikið að benda á þá (dómara) eftir leik. Ég hef reynt að vanda mig við það að vera kurteis við dómarana þegar ég er ósáttur. Mér fannst ég ekki vera farinn af neinu leyti yfir strikið til þess að hann væri að svara svona. Ég viðurkenni það alveg að ég svaraði honum fullum hálsi eftir að þetta var farið af stað frá honum. En ef við, leikmenn eða þjálfarar, segjum svona hluti við dómara þá er ekki vel tekið í það."

Hefði verið lokið með viðurkenningu á mistökum
Áttu von á því að það verði eitthvað gert?

„Nei, það á ég ekki. Og það þarf ekkert að gera neitt mín vegna. Mig grunar að Ívar hafi alveg vitað að hann gerði mistök, hann hafi vitað að þetta voru mistök að láta fyrsta markið standa. Ég held að þessu samtali hefði getað verið lokið strax með einhverri viðurkenningu á því. Þegar menn samþykkja, gera sér grein fyrir því og bara segja það að þeir hafi gert mistök, þá er mikið af vopnum slegið úr höndunum á okkur varðandi ósætti. Ég ætla ekki að óska eftir því að það verði einhverjir eftirmálar. Mér finnst bara að það eigi sama línan að gilda yfir okkur alla varðandi hvernig við tölum við hvern annan."

Finnst eins og Erlendur hefði getað gripið inn í
Ertu búinn að sjá þetta aftur, hver af dómurunum á að sjá þetta best?

„Ívar segir við mig að hann eigi að bera ábyrgð á þessu, þá er það bara þannig. Mín upplifun er sú að þetta er bara einum og hálfum metra frá mér og þ.a.l. Erlendi (Eiríkssyni varadómara). Mér finnst eins og að Elli hefði átt að geta gripið inn í."

Leikmynd sem hefði ekki átt að koma upp
Þú fórst yfir það í gær að þetta mark breytir öllu leikplani. En hefðuð þið getað gert meira í seinni hálfleiknum?

„Já, klálega. Auðvitað hefðum við líka átt að gera betur. En eins og þú segir, leikmyndin breyttist í seinni hálfleiknum og annað markið er eftir þeirri leikmynd sem Blikarnir voru að setja upp. Þeir gáfu okkur töluvert meiri tíma á boltann, voru að bíða eftir að við myndum gera mistök í uppspilinu og þá ætluðu þeir að 'breika' á okkur. Það var leikmynd sem hefði ekkert átt að koma upp."

Orðnir úrslitamiðaðri eins og Víkingur
HK vann báða leikina gegn Breiðabliki í fyrra. Hvað fannst þér Blikar gera öðruvísi en þeir gerðu í fyrra?

„Mér finnst Blikaliðið breytt, finnst það vera að þróast á svipaðan hátt og Víkingsliðið hefur þróast allan tímann undir stjórn Arnars (Gunnlaugssonar). Mér finnst þeir vera fjölbreyttari og einhvern veginn úrslitamiðaðri, ekki jafn frammistöðumiðaðir og þeir voru. Þeir eru líklegir til að breyta til, til þess að sækja úrslit. Það er þróun sem við höfum séð frá Víkingsliðinu. Mér finnst eins og Blikaliðið sé að þróast í sömu átt, þó að það sé margt mjög svipað í þeirra nálgun og það var undir stjórn Óskars (Hrafns Þorvaldssonar). Mér finnst Dóri (Halldór Árnason) vera tilbúnari að breyta meira til, bæði á milli leikja og í leikjum," sagði Ómar.