Enska úrvalsdeildarfélagið Tottenham hefur náð samkomulagi við Southampton um kaup á danska landsliðsmanninum Pierre-Emile Hojbjerg, Enska blaðið Guardian greinir frá þessu í kvöld.
Hojbjerg hefur gefið Southampton það til kynna að hann vilji yfirgefa félagið í þessum glugga en samningur hans rennur út næsta sumar og ætlar hann ekki að framlengja við félagið.
Southampton hefur þó hingað til verið fast á kaupverðinu en Tottenham hefur nú gengið að því að borga 15 milljónir punda fyrir þjónustu hans. Everton lagði einnig fram tilboð í Hojbjerg en hann vill heldur spila fyrir Jose Mourinho.
Samkvæmt Guardian hefur Southampton samþykkt tilboðið og mun því Hojbjerg ræða kaup og kjör við Tottenham á næstu dögum áður en hann skrifar undir langtímasamning hjá félaginu.
Southampton mun þá kaupa Kyle Walker-Peters frá Tottenham en hann var á láni hjá Southampton á síðustu leiktíð. Southampton greiðir 12 milljónir punda fyrir leikmanninn.
Samkvæmt ítalska íþróttafréttamanninum Fabrizio Romano er Tottenham þá að íhuga að selja Tanguy Ndombele til Inter en viðræður hafa verið í gangi síðustu daga en þó ekki komnar langt á veg.
Athugasemdir
