Það var heldur betur áhugaverð umferð í ensku úrvalsdeildinni í miðri viku þar sem Arsenal styrkti stöðu sína með naumum 1-0 sigri gegn Brighton. Á meðan gerði Manchester City aðeins jafntefli gegn Nottingham Forest.
Liverpool tapaði óvænt gegn Úlfunum, Manchester United tapaði loks undir stjórn Michael Carrick og vont verður verra hjá Tottenham sem nálgast fallsætin.
Markvörður: Matz Sels (Nottingham Forest) - Gat ekkert gert í mörkunum sem Manchester City skoraði en átti risastóran þátt í því að koma stiginu yfir línuna í 2-2 jafntefli.
Varnarmaður: Gabriel Magalhaes (Arsenal) - Var algjört skrímsli í vörn Arsenal sem vann Brighton.
Varnarmaður: Dan Burn (Newcastle) - Átti glæsilega frammistöðu í sigrinum gegn Manchester United. Hann er hjartsláttur liðsins og drifkraftur.
Varnarmaður: James Tarkowski (Everton) - Stórhættulegur í föstum leikatriðum og skoraði í 2-0 sigri gegn Burnley.
Miðjumaður: Andre (Wolves) - Brassinn er hrikalega öflugur og skoraði sigurmarkið gegn Liverpool.
Miðjumaður: Declan Rice (Arsenal) - Alltaf réttur maður á réttum stað.
Miðjumaður: Elliot Anderson (Nottingham Forest) - Skoraði glæsilegt mark gegn City og er sterklega orðaður við liðið.
Miðjumaður: Adam Wharton (Crystal Palace) - Átti frábæra stoðsendingu í sigrinum gegn Tottenham. Það verður hægara sagt en gert fyrir Palace að halda honum.
Sóknarmaður: Crysencio Summerville (West Ham) - Er að spila frábærlega fyrir West Ham og skoraði sigurmarkið gegn Fulham.
Sóknarmaður: Ismaila Sarr (Crystal Palace) - Tvö mörk, hraði og kraftur.
Sóknarmaður: Joao Pedro (Chelsea) - Þrjú mörk og stoðsending í sigrinum gegn Aston Villa. Leikmaður umferðarinnar.
Stjórinn: Regis Le Bris (Sunderland) - Frábær sigur Sunderland gegn Leeds.
Athugasemdir
