Á fundi Aga- og úrskurðarnefndar KSÍ í vikunni voru knattspyrnudeildir Kormáks og Hvatar sektaðar um samtals 150.000 krónur vegna framkomu stuðningsmanns félagsins á leik Kormáks/Hvatar og KB í 4. deild karla D riðli sem fram fór 17. júlí síðastliðinn.
Stuðningsmaðurinn viðhafði hátterni er brýtur gegn 16. grein reglugerðar KSÍ um aga-og úrskurðarmál en greinina má sjá hér að neðan.
Samkvæmt upplýsingum Fótbolta.net var áhorfandinn með kynþáttafordóma í garð annars af aðstoðardómurum leiksins.
Hann fær tveggja ára leikvallabann og mætir því ekki á völlinn á næstunni.
16. greinin:
Hver sá sem misbýður öðrum einstaklingi eða hópi með fyrirlitningu, mismunun eða niðurlægingu í orði eða verki varðandi kynhneigð, kynferði, trúarbrögð, skoðanir, þjóðernisuppruna, kynþátt, litarhátt, og stöðu að öðru leyti skal sæta leikbanni í að minnsta kosti 5 leiki og banni frá viðkomandi leikvelli. Jafnframt skal félag viðkomandi sæta sekt að lágmarki að upphæð kr. 100.000. Ef sá brotlegi er forsvarsmaður liðs skal sekt félags nema að lágmarki kr. 150.000.
Athugasemdir
