England í dag - Leicester tekur á móti Arsenal

Í dag heldur veislan áfram og er Lundúnaslagur á dagskrá í hádeginu, þegar Chelsea tekur á móti Crystal Palace.

Lærisveinar Frank Lampard hafa verið að gera frábæra hluti og eru búnir að vinna fimm úrvalsdeildarleiki í röð. Þeir geta hoppað tímabundið upp í 2. sæti deildarinnar með sigri.

Gylfi Þór Sigurðsson verður eflaust í leikmannahópi Everton sem heimsækir Southampton, en óljóst er hvort hann fái pláss í byrjunarliðinu. Jóhann Berg Guðmundsson verður ekki með Burnley gegn West Ham vegna meiðsla sem munu halda honum frá í nokkrar vikur til viðbótar.

Tottenham á þá leik við nýliða Sheffield United á meðan Newcastle fær Bournemouth í heimsókn.

Síðasti leikur dagsins er jafnframt sá stærsti. Leicester tekur þar á móti Arsenal og er til mikils að vinna enda bæði lið sem ætla sér Meistaradeildarsæti í vor. Leicester er í þriðja sæti og Arsenal í fimmta. Leicester getur aukið bilið milli liðanna upp í níu stig með sigri.

Fyrsti og síðasti leikur dagsins verða sýndir beint á Síminn Sport.

Leikir dagsins:
12:30 Chelsea - Crystal Palace (Síminn Sport)
15:00 Southampton - Everton
15:00 Tottenham - Sheffield Utd
15:00 Newcastle - Bournemouth
15:00 Burnley - West Ham
17:30 Leicester - Arsenal (Síminn Sport)