Erling Braut Haaland var á sínum stað í byrjunarliði Noregs sem heimsótti Eistland í undankeppni Evrópuþjóða fyrir HM í gærkvöldi.
Haaland skoraði eina mark leiksins í 0-1 sigri til að halda í fullt hús stiga fyrir Noreg, sem er með 12 stig eftir 4 umferðir.
Norska landsliðið er með mikið af sterkum leikmönnum innanborðs en Haaland virðist vera í sérflokki. Eftir þetta mark gegn Eistlandi er framherjinn stóri búinn að skora 42 mörk í 43 landsleikjum, auk þess að gefa 4 stoðsendingar.
Haaland er búinn að skora átta mörk og gefa eina stoðsendingu í síðustu sex keppnisleikjum og virðist vera óstöðvandi um þessar mundir.
Hann er með hágæðaleikmenn með sér í byrjunarliði Noregs þar sem má meðal annars nefna Alexander Sörloth, Martin Ödegaard og Julian Ryerson.
Þar að auki má finna öfluga leikmenn á borð við Sander Berge, Oscar Bobb, Marcus Pedersen, Jörgen Strand Larsen og Antonio Nusa í sterkum og efnilegum landsliðshópi Norðmanna. Þá er ekki verið að telja leikmenn eins og Kristian Thorstvedt, Hugo Vetlesen og Andreas Hanche-Olsen sem eru utan hóps sem stendur.
Norðmenn sigruðu Ítali sannfærandi 3-0 fyrir helgi og gætu valdið miklum usla á HM í Norður-Ameríku.
Athugasemdir
