Jesus svekktur að hafa ekki skorað meira
Gabriel Jesus er strax byrjaður að reynast gífurlega mikilvægur leikmaður fyrir Arsenal.
Mynd: Arsenal
Gabriel Jesus er strax byrjaður að reynast gífurlega mikilvægur leikmaður fyrir Arsenal.
Mynd: Arsenal
Gabriel Jesus lék á alls oddi er Arsenal mætti Leicester í annarri umferð ensku úrvalsdeildarinnar.
Jesus skoraði fyrstu tvö mörk leiksins í fyrri hálfleik og lagði svo önnur tvö upp í þeim síðari í 4-2 sigri. Hann kom því að öllum mörkum Arsenal í leiknum en var svekktur að leikslokum að hafa ekki skorað meira.
„Ég átti að skora meira. Vinnan mín snýst um að skora mörk og ég gat skorað meira í dag en það skiptir ekki öllu máli. Það sem skiptir mig mestu máli er sigur gegn erfiðum andstæðingum og jákvæð spilamennska liðsins," sagði Jesus.
„Ég er að njóta mín í botn sem nían hérna en ég var ekki óhamingjusamur hjá City. Ég vildi bara spila meiri fótbolta - félagið skildi það og leyfði mér að fara.
„Mér finnst gaman á æfingum hérna og við erum líka með Eddie (Nketiah) sem er gæðamikill sóknarmaður og tilbúinn í úrvalsdeildarfótbolta. Arsenal er með tvo góða sóknarmenn."
