Líkleg byrjunarlið Liverpool og Newcastle á Wembley

Klukkan 16:30 á sunnudag verður úrslitaleikur deildabikarsins á Wembley þar sem Liverpool og Newcastle eigast við. Liverpool er ríkjandi deildabikarmeistari eftir sigur gegn Chelsea í fyrra.

Newcastle hefur ekki unnið stóran titil heima fyrir síðan 1955, þegar liðið vann FA-bikarinn.

Arne Slot staðfesti það í morgun sem allir bjuggust við, Trent Alexander-Arnold verður ekki leikfær fyrir leikinn. Joe Gomez og Conor Bradley eru einnig meiddir og búist við því að Jarell Quansah leiki í hægri bakverðinum.

Ibrahima Konate, sem þurfti að fara af velli í miðri viku, verður væntanlega klár í slaginn og leikur við hlið Virgil van Dijk í hjarta varnarinnar.

Caoimhin Kelleher mun væntanlega halda áfram að verja mark Liverpool í þessari keppni en hann lék virkilega vel í úrslitaleiknum í fyrra og einnig í fyrra.

Hjá Newcastle eru Lewis Hall, Sven Botman og Jamaal Lascelles á meiðslalistanum og þá getur Anthony Gordon ekki tekið þátt í leiknum vegna leikbanns.