Ítalía: Rebic hetja Milan - Larsen skoraði og lagði upp

AC Milan tók á móti Udinese í fyrsta leik dagsins á Ítalíu og komust gestirnir yfir snemma leiks.

Danski bakvörðurinn Jens Stryger Larsen skoraði þá eftir slæm mistök Gianluigi Donnarumma í marki Milan.

Heimamenn fengu færi til að jafna en voru undir þegar flautað var til leikhlés. Stefano Pioli skipti þá Ante Rebic inn fyrir Giacomo Bonaventura og jafnaði hann metin skömmu síðar.

Bakvörðurinn öflugi Theo Hernandez kom Milan yfir með glæsilegu skoti utan teigs og leiddu heimamenn þar til Kevin Lasagna jafnaði í lokin, eftir fyrirgjöf frá Stryger Larsen.

Þegar allt stefndi í jafntefli og komið var í uppbótartíma tók Rebic málin í sínar hendur. Hann náði þá að hleypa af skoti sem endaði í netinu þrátt fyrir að vera með hálfa vörn gestanna í sér.

Zlatan Ibrahimovic lék allan leikinn í liði Milan.

Þetta var annar sigur Milan í röð í deildinni og er liðið aðeins einu stigi frá Evrópusæti, með 28 stig eftir 20 umferðir.

Udinese er í neðri hluta deildarinnar, fjórum stigum eftir Milan.