Það styttist óðum í að Depay verði tilkynntur sem nýr leikmaður Atlético en félagið hefur verið í viðræðum við Barcelona um að fá hann á láni út tímabilið.

Ronald Koeman fékk Depay til Barcelona á frjálsri sölu frá Lyon fyrir tveimur árum.

Þó hann hafi vissulega skorað 13 mörk á fyrsta tímabili sínu hjá Börsungum, þá tókst honum aldrei að finna sig almennilega og var því ákveðið að leyfa honum að finna sér nýtt félag í þessum glugga.

Hann er þegar byrjaður að æfa með Atlético og má því búast við tilkynningu í von bráðar.