Sebastien Haller.
Þýska félagið Borussia Dortmund ætlar sér að kaupa sóknarmanninn Sebastian Haller frá Ajax í Hollandi í sumar.
Dortmund var að selja Erling Braut Haaland í sumar og þarf einhvern veginn að leysa hann af hólmi.
Hollenski íþróttafréttamaðurinn Mike Verweij segir frá því að Dortmund sé búið að bjóða í Haller og það sé tilboð sem erfitt er fyrir Ajax að hafna. Tilboðið er upp á 33 milljónir evra og gæti svo hækkað eitthvað í framtíðinni ef leikmaðurinn stendur sig vel.
Haller er 27 ára gamall og skoraði hann 34 mörk í 43 leikjum á síðustu leiktíð. Hann fór meðal annars mikinn í Meistaradeild Evrópu.
Það eru allar líkur á því að Haller endi í Dortmund en Ajax mun eitthvað reyna að hækka verðið, upp í kringum 40 milljónir evra.
Athugasemdir
