Fóru til Madríd að kaupa Benzema en enduðu með Özil

Özil var upprunalega ekki leikmaður sem Arsenal var að hugsa um að kaupa. Eins og segir í frétt í Guardian þá ræddi Dick Law, sem var yfir félagaskiptamálum hjá Arsenal, við portúgalska umboðsmanninn Jorge Mendes um tvo leikmenn Real Madrid sem voru til sölu.

Þetta voru þeir Angel Di Maria og Karim Benzema. Real var tilbúið að leyfa þessum leikmönnum að fara til að fjármagna kaupin á Gareth Bale.

Arsenal hafði sérstaklega áhuga á Benzema og fór Law til Madrídar til að ræða um kaup á franska sóknarmanninum. Þegar hann kom til Spánar var Benzema hins vegar ekki lengur sá sem var til sölu.

„Við vorum í sjokki," segir Law en Arsenal bauðst þá að kaupa sóknarsinnaða miðjumanninn Özil.

Arsene Wenger, sem var þá stjóri Arsenal, hafði lengi verið aðdáandi Özil og var samþykkur því að kaupa hann.

Özil byrjaði mjög vel fyrir Arsenal en upp á síðkastið hefur hægst á honum. Á þessari leiktíð hefur hann svo ekki verið inn í myndinni hjá fyrrum liðsfélaga sínum og núverandi stjóra Arsenal, Mikel Arteta. Hann mun semja í Tyrklandi á næstunni. Þess má geta að Benzema er enn leikmaður Real Madrid.