Brentford og Wolves áttust við í enska boltanum í dag og tafðist leikurinn um tæpan hálftíma í fyrri hálfleik. Fyrst meiddust tveir miðjumenn Brentford eftir að hafa skollið saman og svo þurftu leikmenn að fara til búningsklefa meðan óþekktur dróni sveif yfir völlinn.

Staðan var markalaus eftir rúmlega 70 mínútna fyrri hálfleik en mörkin fengu að líta dagsins ljós eftir leikhlé. Joao Moutinho skoraði strax eftir þrjár mínútur og tókst heimamönnum í Brentford ekki að jafna fyrr en Ivan Toney kom knettinum í netið á 71. mínútu.

Hvorugt liðið var að skapa mikið en þó tókst Ruben Neves að koma Úlfunum yfir á ný á 78. mínútu.

Heimamenn í Brentford reyndu hvað þeir gátu til að bjarga stigi undir lokin en Úlfarnir voru mikið að tefja og komu knettinum í netið á lokamínútunum en markið ekki gilt vegna rangstöðu.

Thomas Frank, stjóri Brentford, var reiður að leikslokum því hann vildi sjá Jose Sá markvörð Wolves fá rautt spjald fyrir stöðugar leiktafir. Þess í stað fékk Frank sjálfur rautt spjald eftir lokaflautið þegar hann lenti í rifrildi við Joao Moutinho og dómarann.

Þetta eru mikilvæg stig fyrir Wolves sem er í áttunda sæti eftir þrjá sigra í röð. Brentford var að tapa sínum fjórða deildarleik í röð og er átta stigum frá fallsvæðinu.