Tveir leikir fara fram í ítölsku úrvalsdeildinni í dag, upphaflega áttu þeir að vera sex en fjórum þeirra var frestað vegna kóróna veirunnar. Nú er ný lokið fyrri leik dagsins, þar mættust Genoa og Lazio.

Gestirnir í Lazio voru með forystuna í hálfleik eftir að Adam Marusic kom boltanum í netið á 2. mínútu. Boðið var upp á meira fjör í seinni hálfleik.

Ciro Immobile skoraði annað mark Lazio í upphafi seinni hálfleiks. En næst var röðin komin að heimamönnum að skora, Francesco Cassata minnkaði muninn sex mínútum eftir annað mark gestanna.

Lazio náði aftur tveggja marka forystu á 71. mínútu þegar Danilo Cataldi skoraði. Staðan orðin 1-3 en heimamönnum tókst að minnka muninn á 90. mínútu þegar Domenico Criscito skoraði úr vítaspyrnu.

Niðurstaðan 2-3 sigur Lazio sem er nú aðeins einu stigi á eftir toppliði Juventus. Genoa situr áfram í fallsæti.