Lengjudeild kvenna: Linli Tu með tvennu í þægilegum sigri

Sameinað lið Austfirðinga tók á móti efnilegum Kópavogsstúlkum í eina leik dagsins í Lengjudeild kvenna.

Linli Tu hefur verið algjör lykilmaður frá komu sinni á Austfirði og skoraði hún fyrstu tvö mörk leiksins í fyrri hálfleik.

Björg Gunnlaugsdóttir gerði út um viðureignina með þriðja marki heimakvenna í seinni hálfleik og náði Hrafnhildur Ása Halldórsdóttir að minnka muninn með marki úr vítaspyrnu í uppbótartíma.

Fjarðabyggð/Höttur/Leiknir F. er í fjórða sæti með 21 stig eftir 11 umferðir, fjórum stigum eftir HK sem situr í öðru sæti.

Augnablik er með níu stig, fimm stigum fyrir ofan fallsvæðið.