Gundogan kominn aftur til Man City (Staðfest)

„Allir vita hversu mikla virðingu ég ber fyrir Pep Guardiola. Hann er besti stjóri heims og þú verður betri leikmaður á því að vinna með honum á hverjum degi. Í hreinskilni sagt get ég ekki beðið eftir því að klæðast treyju Manchester City á ný," segir Ilkay Gundogan sem er formlega orðinn leikmaður Manchester City á nýjan leik.

Þessi 33 ára þýski miðjumaður var fyrsti leikmaðurinn sem Guardiola keypti til City árið 2016. Hann hefur gert samning við City út þetta tímabil, með möguleika á ári til viðbótar.

„Þau sjö ár sem ég hef átt hjá Manchester City hafa verið tími hreinnar ánægju fyrir mig, bæði innan og utan vallar."

Gundogan var aðeins eitt tímabil hjá Barcelona sem rifti við hann til að losna við launakostnað hans. Gundogan lék 51 leik undir stjórn Xavi á síðasta tímabili. Eftir stjóraskipti og breyttar áherslur tilkynnti Hansi Flick leikmanninum reynda að hann gæti ekki búist við því að vera byrjunarliðsmaður.

Þau sjö ár sem Gundogan á að baki með Manchester City vann hann fjórtán titla með liðinu.