,,Það eru 80 manns sem eru búnir að skrá sig á ráðstefnuna og vonandi eiga fleiri eftir að skrá sig í dag og á morgun," sagði Sigurður Þórir Þorsteinsson formaður knattspyrnuþjálfarafélagsins.

,,Við erum búnir að vinna í undirbúningi að ráðstefnunni í ca 15 mánuði. Þar með eru taldir fundir, símhringingar, tölvupóstar, hugarflæði og svo framvegis."

Sigurður Ragnar Eyjólfsson verður með fyrirlestur um U21 árs landsliðið og Michael Köllner og Raymond Verheijen koma einnig til Íslands til að halda fyrirlestur á námskeiðinu.

,,Suma erlenda fyrirlesara var mjög erfitt að fá og þurftum við að hafa mikið fyrir að fá. Við vorum komnir með Gérard Houllier en hann ákvað að taka við Aston Villa frekar en að koma til okkar," sagði Sigurður Þórir léttur í bragði.

Knattspyrnuþjálfarafélagið var stofnað árið 1970 en á þeim tíma voru slík félög ekki algeng.

,,Knattspyrnuþjálfarafélagið er mjög merkilegt fyrir þær sakir að vera stofnað fyrir 40 árum, 10 árum á undan til dæmis knattspyrnuþjálfarafélagi Evrópu."

,,Framsýnir menn vildu auka menntun innlendra þjálfara og unnu náið með KSÍ til að færa þjálfun og menntun knattspyrnuþjálfara á hærra stig."