„Þetta var bara þroskuð frammistaða hjá Þórsliðinu. Við vorum betri aðilinn í leiknum en missum mann af velli snemma í seinni hálfleik og leystum það alveg gríðarlega vel.“ Voru orð Þorláks Árnasonar þjálfara Þórs um leik sinna manna eftir 2-0 sigur piltanna úr Þorpinu á Akureyri gegn Þrótti Vogum í Vogum í dag.
Lestu um leikinn: Þróttur V. 0 - 2 Þór
Deildar meiningar voru um rauða spjaldið sem Þorlákur minntist á sem fór á loft þegar Alexander Már Þorláksson slapp í gegn og lenti í samstuði við markvörð Þróttara. Dómaratríóið virtist ekki vera á einu máli hvað gera skyldi en niðurstaðan varð sú að Alexander fékk að líta rauða spjaldið.
„Aðstoðardómarinn ætlaði að dæma rautt á markmanninn og hann í bestri aðstöðu til að sjá þetta. Alexander er á undan í boltann og markmaðurinn bara of seinn og hann (Alexander) endar með takkanna á höfðinu á honum en ég var mjög hissa á því að dómarinn skyldi hunsa aðstoðardómarann sem var í miklu betri stöðu en við erum orðnir vanir þessu.“
Lið Þórs sat í 10.sæti deildarinnar fyrir leik dagsins sem er langt í frá það sem liðið ætlaði sér fyrir mót þó liðið geti ekki fallið. Stutt er þó á milli í töflunni og getur lið Þórs vel klifið talsvert ofar með sigrum í síðustu leikjum sínum. Hvernig er að mótivera liðið í leiki með lítið undir?
„Það er auðvitað áskorun fyrir öll lið sem hafa að litlu að keppa. Þessi úrslitakeppni sem verður á næsta ári hún mun hjálpa til fyrir þessi lið sem verða frá 2-5 í Lengjudeildinni. En það hefur verið mikill stöðugleiki í frammistöðum hjá okkur í síðustu 10 leikjum og bara eitt besta liðið i seinni umferðinni.“
Sagði Láki en allt viðtalið má sjá hér að ofan.
Athugasemdir
