Saka fékk bolamynd með Beckham

Gareth Southgate bauð engum öðrum en David Beckham í heimsókn í herbúðir enska landsliðshópsins í Katar. Beckham spjallaði við nokkra leikmenn og fékk sérstaka goðsagnatreyju frá Southgate.

Meðan Beckham var að spjalla við Southgate kom Bukayo Saka, leikmaður Arsenal, upp að honum og bað kurteisislega um mynd af sér með honum.

Saka var aðeins tólf ára gamall þegar Beckham lagði skóna á hilluna og sagði við hann: „Afsakið að ég sé að trufla, en get ég fengið mynd með þér?"

Beckham, sem skoraði sögufrægt mark gegn Grikklandi 2001 þegar Saka var rétt um mánaðar gamall, brosti og setti handlegginn um herðar Saka.

Beckham lék 115 landsleiki fyrir England 1996-2009.