Tottenham bætti við sig tveimur miðjumönnum í sumar, þeim Tanguy Ndombele og Giovani Lo Celso.
Félagið var þó nálægt því að krækja í Nicoló Zaniolo, ungstirni AS Roma, í sumar en hann reyndist of dýr. Zaniolo framlengdi svo samning sinn við Roma í síðasta mánuði.
„Tottenham reyndi að fá hann til sín í sumar. Það er mikilvægt félag, þeir enduðu í öðru sæti í Meistaradeildinni, Að lokum varð ekkert úr skiptunum," sagði Claudio Vigorelli, umboðsmaður Zaniolo.
„Áhugi Tottenham segir allt sem segja þarf um hversu vel Zaniolo spilaði á síðustu leiktíð."
Tottenham hætti við Zaniolo því Roma vildi ekki lána hann út. Lo Celso kom þess í stað á lánssamningi frá Real Betis.
Vigorelli hefur miklar mætur á skjólstæðingi sínum og líkir honum gjarnan við Paul Gascoigne.
„Nicoló er mikill fagmaður sem ítalska landsliðið mun reiða sig mikið á í framtíðinni. Hann er fæddur til að spila fótbolta og mun leika mikilvægt hlutverk í liði Fonseca.
„Hann líkist Gascoigne mjög mikið sem leikmaður, þó með talsvert mildari persónuleika."
Zaniolo er 20 ára gamall og á 2 A-landsleiki að baki fyrir Ítalíu.
Athugasemdir