Spennandi lokasprettur í Lengjudeildinni - Fimm lið berjast um toppsætið

Heil umferð var leikin í Lengjudeildinni í gær og er ljóst að mikil spenna verður fyrir síðustu fjórar umferðir deildarinnar.

Efstu þrjú liðin töpuðu öll stigum á meðan Njarðvík (4. sæti) og HK (5. sæti) unnu sína leiki. Toppsætið fer beint upp í Bestu deildina en sæti 2-5 eru umspilssæti.

Fimm stig eru frá fimmta sæti niður í það sjötta en Grótta, sem er í 6. sæti, á þó leik til góða. Þá eru aðeins fjögur stig frá fimmta sæti yfir í það fyrsta.

Topplið Aftureldingar er í bestu stöðunni fyrir lokasprettinn en vegna bikarævintýris Mosfellinga á liðið einn leik til góða.

Efstu fimm liðin eiga öll eftir að spila að minnsta kosti einn innbyrðis leiki. HK á eftir að spila gegn efstu þremur liðunum í síðustu fjórum umferðunum. Þá á Njarðvík einungis eftir að mæta einu liði úr efstu fimm sætunum í lokasprettinum.

Sömuleiðis er mikil spenna á botninum. Ægir getur fallið í næstu umferð en liðið er aðeins með átta stig. Húsvíkingar hafa sótt í sig veðrið undanfarið og unnið þrjá af síðustu fjórum leikjum en liðið er í 11. sæti.

Völsungur er aðeins tveimur stigum frá Grindavík og þremur stigum frá ÍR. Völsungur og ÍR mætast í næst síðustu umferðinni á Húsavík.