HK tók forystuna í leiknum og þeir fengu tækifæri til að komast í 1-2 fyrir leikhlé. Stefan Alexander Ljubicic, sem hefur staðið sig vel í upphafi móts, klikkaði hins vegar illa á vítapunktinum.

„Stefan Ljubicic reynir að skjóta í vinstra hornið en Gunnar Nielsen er búin að lesa hann og er mættur niður í hornið og grípur þetta í horninu! Var nánast eins og æfingarskot fyrir Gunna!" skrifaði Stefán Marteinn Ólafsson í beinni textalýsingu frá leiknum.

Atli Viðar Björnsson, fyrrum sóknarmaður FH, var ekki hrifinn af tilhlaupi sóknarmanns HK.

„Mikið ofboðslega líta menn alltaf kjánalega út þegar þeir eru með eitthvað tipl og tif þegar þeir klikka svo á vítinu. Af hverju tekurðu þetta ekki bara eins og maður," sagði Atli Viðar.

Þetta atvik breytti leiknum því FH kom inn í seinni hálfleikinn og gekk frá leiknum.