Sterkasta lið 20. umferðar - Halda sér uppi þvert á allar spár

Fram tryggði veru sína í deildinni. Það spáðu allir Frömurum falli fyrir tímabilið en þær hafa gert vel og tryggðu áframhaldandi sæti sitt í deildinni með sigri á Akureyri gegn Þór/KA. Sara Svanhildur Jóhannsdóttir hefur leikið mjög vel með Fram í sumar og þarna átti Brookelyn Paige Entz líka góðan leik.

Breiðablik vann endurkomusigur á ÍBV þar sem Guðný Geirsdóttir var maður leiksins en Blikar söfnuðu saman næstum því 6 í xG í þessum leik. Agla María Albertsdóttir var best í liði Blika og er í sterkasta liðinu í níunda sinn í sumar.

Blikar eru í kjörstöðu þar sem FH missteig sig gegn Grindavík/Njarðvík, 3-2. Emma Nicole Phillips og Tinna Hrönn Einarsdóttir fóru fyrir liði Grindavík/Njarðvíkur í þessum leik. Gylfi Tryggvason gerði mjög sterk tilkall að vera þjálfari umferðarinnar en það fellur í hlut Antons Inga, þjálfara Fram, þar sem þær tryggðu sæti sitt í deildinni með frábærum sigri.

Þá vann Þróttur þægilegan 5-1 sigur á Stjörnunni í efri hlutanum. Hin 16 ára gamla Bríet Fjóla Bjarnadóttir setti þrennu og var auðvitað maður leiksins. Sæunn Björnsdóttir átti líka góðan leik fyrir Þróttara sem og auðvitað Katie Cousins.