Lengjudeildin: Fallbaráttan magnast - Ægir féll

Fallbaráttulið Völsungs og ÍR unnu heimaleiki sína gegn Vestra og Njarðvík. Þetta er sérstaklega slæmt fyrir Njarðvíkinga sem misstu hér af tækifæri til að bæta stöðu sína í toppbaráttu deildarinnar til muna.

ÍR tók á móti Njarðvík og skoraði Emil Nói Sigurhjartarson eina markið í fjörugum fyrri hálfleik þar sem bæði lið fengu góð tækifæri til að bæta við mörkum. Arnleifur Hjörleifsson jafnaði metin í upphafi síðari hálfleiks og héldu bæði lið áfram að fá færi í skemmtilegum og opnum slag.

Heimamenn sköpuðu þó bestu færin og stóðu uppi sem sigurvegarar þökk sé mörkum frá Guðjóni Mána Magnússyni og Bergvin Fannari Helgasyni, lokatölur 3-1. ÍR er með 22 stig eftir 19 umferðir, tveimur stigum fyrir ofan Völsung sem situr í fallsæti þrátt fyrir 2-0 sigur gegn Vestra.

Staðan var markalaus fyrstu 80 mínúturnar á Húsavík. Heimamenn í liði Völsungs fengu besta færið í jöfnum fyrri hálfleik en gestirnir frá Ísafirði fengu frábær færi í seinni hálfleik sem fóru forgörðum.

Vestri var sterkari aðilinn þar til á lokakaflanum þegar heimamenn tóku völdin og náðu að setja boltann í netið í tvígang. Inigo Arruti skallaði hornspyrnu fyrst í netið á 80. mínútu og fjórum mínútum síðar tvöfaldaði Elfar Árni Aðalsteinsson forystuna úr vítaspyrnu sem hann fiskaði sjálfur.

Þetta er þriðji sigurinn í röð hjá Völsungi sem hefur ennþá þrjár umferðir til að bjarga sér frá falli. Liðið er aðeins einu stigi á eftir Grindavík sem gerði markalaust jafntefli við Gróttu.

Það var lítið um færi í Grindavík þar sem var afar hvasst og boltinn mikið úr leik, svo hvorugu liði tókst að skora. Grótta siglir lygnan sjó um miðja deild en Grindavík á erfiðan lokakafla framundan.

Ægir féll að lokum úr Lengjudeildinni með stóru tapi á útivelli gegn Leikni R. í leik sem Axel Freyr Harðarson fór á kostum og skoraði þrennu.

Leiknir vann 6-1 og er fimm stigum frá fallsæti þegar þrjár umferðir eru eftir. Ægir leikur í 2. deild næsta sumar.

ÍR 3 - 1 Njarðvík
1-0 Emil Nói Sigurhjartarson ('20 )
1-1 Arnleifur Hjörleifsson ('46 )
2-1 Guðjón Máni Magnússon ('60 )
3-1 Bergvin Fannar Helgason ('76 )

Lestu um leikinn

---

Völsungur 2 - 0 Vestri
1-0 Inigo Albizuri Arruti ('80 )
2-0 Elfar Árni Aðalsteinsson ('84 , víti)

Lestu um leikinn

---

Grindavík 0 - 0 Grótta

Lestu um leikinn

---

Leiknir R. 6 - 1 Ægir
1-0 Axel Freyr Harðarson ('10 )
2-0 Anton Fannar Kjartansson ('16 )
3-0 Axel Freyr Harðarson ('24 )
4-0 Kári Steinn Hlífarsson ('39 )
4-1 Harley Bryn Willard ('41 )
5-1 Axel Freyr Harðarson ('58 )
6-1 Axel Örn Kjartansson ('70 )

Lestu um leikinn