Eins og Fabrizio Romano greindi frá í kvöld miðar viðræðum Liverpool og Juventus ágætlega áfram.

Kaupverðið er í kringum 13 milljónir punda og er Liverpool að vinna hörðum höndum að því að ganga frá samkomulagi við Juventus og leikmanninn.

Ornstein segir Chiesa fá fjögurra ára samning hjá Liverpool, en félagið hefur lengi haft áhuga á ítalska landsliðsmanninum. Enskir miðlar tala um að hann muni þéna 80 þúsund pund í vikulaun.

Barcelona hafði einnig áhuga á að fá hann en gat það ekki vegna fjárhagsstöðu félagsins.

Chiesa er 26 ára gamall vængmaður sem hefur glímt við erfið meiðsli síðustu ár. Hann sleit krossband í hné í byrjun árs 2022 og var lengi að jafna sig af þeim.

Á síðasta tímabili kom hann sér aftur á skrið og spilaði 33 deildarleiki og skoraði 9 mörk er Juventus hafnaði í 3. sæti Seríu A.