„Sjaldgæft að sjá alvöru fyrirmyndir eins og Kane"

Kane kaus að vera ekki að tjá sig mikið þrátt fyrir tíðar spurningar um Ballon d'Or. Hann talaði alltaf af hógværð og virðingu á meðan styttra var í hrokann hjá Mbappé og Yamal.

Kane er 33 ára gamall, fimm og hálfu ári eldri heldur en Mbappé og fjórtán árum eldri en Yamal.

„Harry Kane á þessi verðlaun skilið og ekki bara út af því að hann átti ótrúlegt tímabil á síðustu leiktíð, heldur líka út af því að hann er alvöru fyrirmynd," segir Karl-Heinz Rummenigge, goðsögn og stjórnandi hjá FC Bayern. „Það er sífellt sjaldgæfara að finna alvöru fyrirmyndir í íþróttaheiminum og í samfélaginu í heild."

Kane hefur fengið mikið hrós frá ýmsum goðsögnum úr fótboltaheiminum eftir að hafa unnið Ballon d'Or verðlaunin. Þar að auki lýsti Vilhjálmur Bretaprins yfir stolti sínu.

Kane er fyrirliði enska landsliðsins og markahæstur í sögunni, ásamt því að deila meti með Peter Shilton yfir flesta spilaða landsleiki.

Kane á 91 mark í 125 landsleikjum og er markahæsti leikmaður í sögu Tottenham. Hann skoraði þá 73 mörk í 65 leikjum fyrir Bayern og England á síðustu leiktíð, sem varð til þess að hann vann Ballon d'Or kosninguna.