Sveinn Gísli brotnaði illa - „Missir mjög sennilega af restinni af tímabilinu"

Sveinn Gísli Þorkelsson, varnarmaður Víkings, varð fyrir því óláni að handleggsbrotna undir lok leiks liðsins gegn KR í kvöld.

Sveinn Gísli meiddist á 88. mínútu og þá var staðan í leiknum 0-0 en lokatölur urðu 1-1 þar sem bæði lið skoruðu í uppbótartímanum. Eftir leikinn í kvöld var hann að bíða eftir sjúkrabíl.

„Höndin á honum er brotin sem er mjög slæmt. Leiðinlegt fyrir Gilla að lenda í þessu, hann var búinn að spila óaðfinnanlegan leik. Hann missir mjög sennilega af restinni af tímabilinu. Það er svekkjandi fyrir hann og missir fyrir okkur að missa gæðamikinn leikmann eins og Gilla," sagði Sölvi Geir Ottesen, þjálfari Víkings, við Fótbolta.net eftir leikinn.