Tindastóll hélt áfram uppteknum hætti í Lengjudeild kvenna í kvöld er liðið spilaði við ÍA á Akranesi í 17. umferð.

Tindastóll er búið að tryggja sér sæti í Pepsi Max-deild kvenna fyrir næsta tímabil en liðið hefur aðeins tapað einum leik á leiktíðinni.

Það varð engin breyting á því í kvöld en liðið skoraði fjögur mörk gegn tveimur frá ÍA og vann því 4-2 útisigur. ÍA er búið að tryggja sæti sitt í deildinni og er í áttunda sætinu af tíu.

Murielle Tiernan átti stórleik fyrir gestaliðið í viðureigninni og skoraði þrennu.

Tindastóll er búið að tryggja sér deildarmeistaratitilinn með sigrinum og er sjö stigum á undan Keflavík í öðru sæti þegar ein umferð er eftir.