Víkingur Ólafsvík tapaði á heimavelli gegn Leikni R. í Lengjudeildinni í dag og mætti Guðjón Þórðarson í viðtal að leikslokum.
„Við vorum ekki alveg í takt og bitið fór úr sókninni eftir að við misstum Gonzalo meiddan af velli. Á köflum vorum við að spila gegn sjálfum okkur, tókum of margar erfiðar ákvarðanir sem reyndust okkur þungbærar," sagði Gaui, sem vildi fá vítaspyrnu þegar Vignir Snær Stefánsson féll innan vítateigs í stöðunni 0-1.
„Svo var stór ákvörðun tekin þegar Vignir er sleginn niður í vítateignum í stöðunni 1-0. Þá hefðum við fengum víti og sennilega hefði markmaðurinn átt að fá rautt, allavega gult, og það hefði munað um það. Við áttum færi í leiknum, markvörðurinn þeirra stóð sig vel. Þeir þurftu að hafa fyrir sigrinum en þeir eru með gott lið og áttu sigurinn skilið."
Gaui óttast að Gonzalo Zamorano, sem fór meiddur af velli, geti verið lengi frá vegna meiðsla.
„Þetta lítur ekki alltof vel út, því miður hefur maður áhyggjur af Gonza. Þeir detta niður, varnarmaðurinn dettur á hnéð á honum og það snýst uppá hnéð. Það beygist inn og þetta lítur út fyrir að vera tognað liðband, vonandi er það ekki meira. Tognað liðband þýðir að hann spilar ekki meira og það er mikill missir því Gonzalo hefur verið jákvæður, unnið vel og verið góður leikmaður."
Ólsarar eru svo gott sem búnir að bjarga sér frá falli þrátt fyrir tapið. Þeir eru með 19 stig eftir 20 umferðir.
Athugasemdir