Vlahovic fagnaði með mögnuðum Djokovic

Dusan Vlahovic sóknarmaður Juventus var mættur til Parísar um helgina til að fylgjast með Ólympíuleikunum.

Hann sá landa sinn, serbnesku tennisgoðsögnina Novak Djokovic, tryggja sér Ólympíugull með því að leggja Spánverjann Carlos Alcaraz í stórkostlegum úrslitaleik.

Djokovic, sem er dyggur stuðningsmaður AC Milan, hélt partí á veitingastaðnum Siena í París og þar var Vlahovic mættur og skemmti sér konunglega.

AC Milan óskaði Djokovic til hamingju á sínum samfélagsmiðlum en frægt er þegar þessi ótrúlegi íþróttamaður hélt á treyju félagsins eftir að hafa unnið opna bandaríska á síðasta ári. Djokovic hefur nú unnið allt sem hægt er að vinna í tennisheiminum.