Ísak Bergmann fær gífurlega mikið lof

Hinn 17 ára gamli Ísak Bergmann Jóhannesson hefur slegið í gegn í byrjun tímabils í sænsku úrvalsdeildinni. Ísak skoraði sitt fyrsta mark í úrvalsdeildinni í 3-1 sigri á IFK Gautaborg í gær.

Norrköping er á toppnum með 16 stig eftir sex leiki en Ísak hefur lagt upp þrjú mörk nú þegar í deildinni.

Ísak hefur vakið mikla athygli á miðjunni hjá Norrköping í upphafi tímabils og sænskir fjölmiðlar hafa hrósað frammistöðu hans í hástert.

„Ísak Bergmann Jóhannesson er með yfirsýn og leikskilning í heimsklassa," sagði Simon Thern, miðjumaður Norrköping eftir leikinn í gær.

Landsliðsmaðurinn Arnór Sigurðsson hrósaði Ísak einnig í hástert en Arnór fór á sínum tíma frá Norrköping til CSKA Moskvu.

Ísak kom til Norrköping frá ÍA eftir sumarið 2018 en faðir hans er Jóhannes Karl Guðjónsson, þjálfari Skagamanna og fyrrum landsliðsmaður.