Tindastóll tók á móti Skallagrími í eina leik kvöldsins í 4. deildinni og tók forystuna undir lok fyrri hálfleiks, þegar Hrafnkell Váli Valgarðsson varð fyrir því óláni að setja boltann í eigið net.

Arnar Ólafsson tvöfaldaði forystu Tindastóls í upphafi síðari hálfleiks og gerði þar með út um viðureignina, lokatölur 2-0.

Þetta er dýrmætur sigur fyrir Tindastól sem er í þriðja sæti deildarinnar og setur mikla pressu á toppliðin tvö sem hafa verið að tapa leikjum að undanförnu.

Stólarnir eru þremur stigum á eftir toppliði Ýmis, sem hefur tapað tveimur leikjum í röð, og einu stigi á eftir Hamri, sem hefur tapað tveimur af síðustu þremur. Það er því mikil spenna í toppbaráttunni.

Skallagrímur vermir botnsæti deildarinnar með 6 stig eftir 10 umferðir. Tindastóll er með 19 stig.

Skallagrímur er þó aðeins einu stigi frá öruggu sæti í deildinni, þar sem framundan virðist vera afar áhugaverð fallbarátta við KFS og RB.