Sjáðu hvers vegna Arnar fékk rauða spjaldið í gær

Hilmar Jökull, stuðningsmaður Breiðabliks, birti í dag tvö myndbönd á samfélagsmiðlinum X sem sýna viðbrögð Arnars Gunnlaugssonar, þjálfara Víkings, áður en hann fékk að líta rauða spjaldið frá dómara leiksins í gær, Vilhjálmi Alvari Þórarinssynu.

Arnar gengur að fjórða dómara leiksins, Arnari Inga Ingvarssyni, og grýtir þjálfaramöppu sinni í jörðina í bræði. Hann grýtir henni svo aftur í jörðina skömmu síðar.

Arnar var ósáttur að ekkert brot var dæmt þegar Sveinn Gísli Þorkelsson fór niður eftir að Gunnar Jónas Hauksson renndi sér. Leikurinn hélt áfram og upp úr þeirri sókn Vestra skoraði Gunnar Jónas jöfnunarmark Vestra.

Í viðtölum eftir leik var Arnar svo mjög ósáttur við að Eiður Aron Sigurbjörnsson hefði ekki fengið rauða spjaldið fyrir atvik sem átti sér stað fyrr í leiknum. Viðtal hans við Fótbolta.net má sjá í spilaranum neðst.

Arnar fékk rauða spjaldið fyrir hegðun sína og er á leið í leikbann fyrir rauða spjaldið, að minnsta kosti tveggja leikja bann þar sem um annað rauða spjald hans í sumar er að ræða.