Rúben Amorim var mjög hress eftir ótrúlegan fótboltaleik í gærkvöldi þar sem Manchester United tókst með ótrúlegum hætti að tryggja sér sæti í undanúrslitum Evrópudeildarinnar.
Rauðu djöflarnir leiddu 2-0 gegn Lyon á Old Trafford, en gestirnir frá Frakklandi náðu að jafna í seinni hálfleik og knýja leikinn í framlengingu. Það voru aðeins tíu leikmenn Lyon eftir á vellinum þegar komið var í framlengingu, en þeim tókst þrátt fyrir það að skora tvö mörk.
Staðan var því orðin 2-4 fyrir tíu leikmenn Lyon þegar Rauðu djöflarnir skiptu um gír og tókst að skora þrjú mörk til viðbótar í framlengingunni. Lokatölur urðu því 5-4 fyrir Man Utd eftir sögulegan fótboltaleik.
Miðvörðurinn stóri Harry Maguire spilaði sem fremsti sóknarmaður United í framlengingunni og var stórhættulegur þangað til hann skoraði sigurmarkið í uppbótartíma.
„Við settum Harry Maguire upp á topp því hann er eini leikmaðurinn okkar sem getur skorað með skalla," sagði Amorim meðal annars eftir sigurinn í gærkvöldi.
„Við þurfum að taka áhættur í úrvalsdeildinni, við munum nota ungu leikmennina þar og hvíla hina fyrir Evrópudeildina. Við verðum að leggja allt púður í þessa keppni."
Man Utd tekur á móti Wolves á sunnudaginn og heimsækir svo Bournemouth viku síðar. Fyrri undanúrslitaleikur Evrópudeildarinnar gegn Athletic Bilbao fer fram 1. maí og seinni leikurinn 8. maí.
Athugasemdir
