Jói Berg: Grátlegt að vera svona nálægt þessu og ná ekki á EM

„Við fáum á okkur léleg mörk og það er erfitt að kyngja þessu. Við féllum ansi aftarlega á völlinn, auðvitað reyndum við að verjast en héldum ekki nógu vel í boltann. Það er erfitt að halda þannig út í 90 mínútur en það er samt grátlegt þegar við erum svona nálægt þessu að fá á sig tvö mörk og ná ekki á EM."

„Við bjuggumst auðvitað við því að það kæmi kraftur hjá þeim 1-0 undir og þannig séð á heimavelli. Við komumst í gegnum það og það var erfitt að fá jöfnunarmarkið á sig. Svo var hræðilegt að fá annað markið á sig og þá verð þetta erfitt."

Hvað fór úrskeiðis í mörkunum?

„Fyrra markið er skyndisókn hjá þeim og hann nær að komast á vinstri fótinn og kláraði það nokkuð vel. Við eigum að geta varist þessu en svona er fótboltinn stundum. Í seinna markinu er hann einhvern veginn aleinn fyrir utan og ég fer út og reyni að hjálpa Jóni Degi en þá er Mudryk mættur inn á miðjuna og klárar þetta. Auðvitað erum við með nóg af mönnum þarna til að verjast þessu en gerum það ekki."

Nánar er rætt við hann í spilaranum að ofan en þegar Jóhann var spurður út í tvö Evrópumót í röð sem við missum af á sárgrætilegan hátt sagði hann.

„Já í bæði skiptin komnir 1-0 yfir og ansi stutt frá þessu. Það er gríðarlega erfitt að taka þessu en svona er fótboltinn, það er næsta mót og reyna að koma sér þangað."<>/i>