Norski framherjinn Ola Solbakken er búinn að skrifa undir fjögurra og hálfs árs samning hjá Roma sem gildir til sumarsins 2027 en hann kemur frá Bodö/Glimt á frjálsri sölu.
Solbakken verður leikmaður Roma þann 1. janúar en Roma hefur beðið Bodö/Glimt um að leyfa leikmanninum að æfa með liðinu fram að áramótum. Roma er þessa stundina í æfingabúðum í Japan.
Köldu hefur andað á milli þessara tveggja félaga frá síðasta tímabili en þau mættust tvisvar sinnum í Sambandsdeildinni.
Allt sauð upp úr eftir fyrri leik liðanna í útsláttarkeppninni þar sem Bodö/Glimt sakaði Roma um slæma hegðun og Roma gerði slíkt hið sama um norska liðið.
Bodö/Glimt neitar að leyfa Solbakken að byrja æfa með Roma fram að áramótum en liðið hefur fullan rétt til þess að gera það.
Bodö/Glimt valtaði yfir Rómverja í riðlakeppninni í Sambandsdeildinni á síðustu leiktíð en Roma tókst að svara fyrir sig í útsláttarkeppninni og að lokum vann félagið titilinn.
