Annað árið í röð er Afturelding að taka þátt í þessum leik en liðið tapaði gegn Vestra í fyrra.

„Maður var smá brotinn í fyrra og það var aðeins of mikið eins og þetta væri eini sénsinn. Svo fattaði maður að það væri annar góður séns í haust og það kom í ljós núna. Það kemur alltaf nýtt tímabil og við hefðum kannski átt að vera fljótari að jafna okkur," segir Aron.

Aftureldingu var spáð mjög góðu gengi fyrir mót en liðið var lengi í gang og var í neðri hlutanum fyrri hluta móts. Svo fóru hlutirnir að ganga betur.

„Það virðist vera þannig í Lengjudeildinni að liðið sem er með pressuna á sér, bæði í spánni fyrir mót og ef þú byrjar mótið vel, þau höndla það ekki. Það er þannig í Lengjudeildinni að liðin eru svipað góð. Það er eins og menn mótíveri sig meira þegar verið er að keppa gegn liðum sem eiga að vera góð. Það er kannski skrítið en það virðist virka þannig í þessari deild," segir Aron.

Við getum gert bæði
Afturelding gerði vel í undanúrslitum umspilsins gegn Fjölni, unnu 3-1 í fyrri leiknum og lokuðu vel í þeim seinni.

„Við buðum upp á Aftureldingarsýningu í fyrri leiknum enda á heimavelli og með allt að sækja þar sem við vissum af seinni leiknum. Þegar við vorum komnir í góða stöðu ákváðum við að bíða og sjá hvað Fjölnir vildi gera. Við lokuðum vel á þá," segir Aron.

„Ég er sókndjarfur varnarmaður oftast en þetta var óvenju gaman. Við vorum að bíða eftir því að þeir myndu brjóta okkur niður og þetta var svona smá Everton bolti, Sean Dyche bolti einhver. Maður hefur gaman að því líka. Við getum gert bæði."

Aron er spenntur fyrir því að takast á við Keflavík í úrslitaleiknum á morgun.

„Við töpuðum báðum leikjunum á móti þeim í sumar frekar illa. Það var mikið af slæmum augnablikum í þeim leikjum og ég held að það sé ágætt bara; við komum inn í leikinn og eigum allt að sýna, að við getum unnið þetta lið. Það er gott hugarfar til að koma með inn í leikinn," sagði hann að lokum.