Besta deildin: Óskar Borgþórs fór á kostum á Hlíðarenda

Íslandsmeistararnir í Víkingi eru með þriggja stiga forystu á toppi Bestu deildarinnar eftir 5-1 sigur liðsins á Val á Hlíðarenda í kvöld. Óskar Borgþórsson gerði sér lítið fyrir og skoraði þrennu.

Valsmenn hafa verið þokkalega sterkir á tímabilinu en meistararnir í meistaragír og héldu þeir áfram í þeim gír.

Helgi Guðjónsson skoraði á 5. mínútu. Oliver Ekroth kom löngum bolta fram völlinn og á Helga sem skoraði. Rosalega einfalt og leit varnarleikurinn ekkert frábærlega út hjá heimamönnum.

Víkingar héldu áfram að ógna og var röðin komin að Óskari Borgþórssyni sem gerði laglegt mark á 34. mínútu. Hann vann boltann, keyrði upp og smellti honum í netið.

Rúmri mínútu síðar kom hann Víkingum í þriggja marka forystu er hann skallaði fyrirgjöf Ármanns Inga Finnbogasonar í netið.

Aðeins eitt lið á vellinum í fyrri hálfleik og í byrjun síðari fullkomnaði Óskar þrennuna og það með öðru skallamarki sínu eftir fyrirgjöf frá Karli Friðleifi Gunnarssyni.

Tryggvi Hrafn Haraldsson minnkaði muninn á 60. mínútu er hann slapp í gegn.

Víkingar fóru í það reyna klára leikinn. Óskar var nálægt fernunni og þá setti Valdimar Þór Ingimundarson boltann framhjá eftir sendingu frá Elíasi Má Ómarssyni.

Fimmta markið kom á endanum. Karl Friðleifur Gunnarsson fékk boltann inn á teignum og kláraði vel framhjá Frederik Schram.

Alger einstefna hjá Víkingum sem eru með 28 stig á toppnum á meðan Valur er með 15 stig 5. sæti.