| fim 01.apr 2021 09:00 Mynd: Fótbolti.net - Hafliði Breiðfjörð |
|
Sveindís ótrúlega spennt: Ekki nóg að segja það upphátt og gera ekkert í því
Það var mikið rætt og skrifað um Sveindísi Jane Jónsdóttur á síðasta ári enda var árið 2020 bara hennar ár hér á Íslandi.
Hún var lánuð í Breiðablik frá Keflavík og var besti leikmaður Íslandsmótsins er Blikar urðu Íslandsmeistarar. Hún kom einnig inn í íslenska A-landsliðið og vakti mikla athygli fyrir frammistöðu sína þar.
Undir lok ársins gekk hún í raðir þýska stórliðsins Wolfsburg en var lánuð í Kristianstad í Svíþjóð þar sem er mikil Íslandstenging. Fréttamaður Fótbolta.net ræddi við Sveindísi um tímann í atvinnumennsku til þessa og sitthvað fleira.
'Ég held að mesta breytingin sé að þurfa elda og ganga frá sjálf alla daga, en það venst'
Sveindís í leik gegn sænska landsliðinu á síðasta ári.
Sif Atladóttir er liðsfélagi Sveindísar hjá Kristianstad.
Tvær bestu leikmenn Íslandsmótsins í fyrra; Sveindís og Agla María Albertsdóttir.
'Það er held ég ekkert betra en að klæðast landsliðstreyjunni og spila fyrir Ísland'
Sveindís, sem er ein af vonarstjörnum Íslands, er með stór markmið og lítil.
Sveindís flutti til Svíþjóðar fyrir nokkrum vikum síðan og auðvitað hafa ákveðnar breytingar fylgt því.
„Lífið í Svíþjóð er bara mjög fínt! Ég held að mesta breytingin sé að þurfa elda og ganga frá sjálf alla daga, en það venst," segir Sveindís létt.
Hún er mjög spennt fyrir tímabilinu. Liðið hefur verið að spila í sænska bikarnum en deildin hefst eftir um tvær vikur.
„Ég er ótrúlega spennt fyrir tímabilinu og það er orðið ansi stutt í að þessi veisla byrji," segir þessi öflugi framherji.
Ekki að setja markmið með markaskorun
Sveindís skoraði 14 mörk í 15 deildarleikjum á síðustu leiktíð í Pepsi Max-deildinni. Sænska úrvalsdeildin er mikið sterkari deild. Sveindís kveðst ekki vera með markmið um sérstakan markafjölda fyrir tímabilið.
„Ég er ekki mikið fyrir að setja mér markmið um markaskorun en ég vil að öllum gangi vel inn á vellinum, og að við vinnum leikinn sama hvort að ég skori eða einhver önnur. Ég geri allt sem ég þarf að gera svo að við vinnum alla leiki," segir Sveindís sem ætlar að byrja á því að vinna sér inn byrjunarliðssæti, það er fyrsta markmið með Kristianstad.
„Ég ætla byrja á því að vinna mér inn byrjunarliðssæti því það er alls ekki sjálfgefið, það er samkeppni í öllum stöðum vallarins og meira að segja samkeppni um það að komast í hóp. Ég ætla mér að vera í byrjunarliðinu og eins og ég segi hér fyrir ofan þá fer ég í alla leiki til þess að vinna."
Kristianstad er mikið Íslendingafélag. Sif Atladóttir er í leikmannahópnum og þjálfarar liðsins eru þau Elísabet Gunnarsdóttir og Björn Sigurbjörnsson. Þá er Bára Kristbjörg Rúnarsdóttir að þjálfa unglingalið félagsins.
„Það hefur gert svo gríðarlega mikið fyrir mig að hafa alla þessa Íslendinga í kringum mig. Kristianstad er frábær staður til þess að vera á og hér hafa allir tekið vel á móti mér; liðsfélagarnir eru frábærir."
Hausinn alfarið á sænsku úrvalsdeildinni
Kristianstad er ekki stærsti bær í heimi en undir stjórn Elísabetu Gunnarsdóttur hefur kvennalið félagsins fest sig í sessi í sænsku úrvalsdeildinni, og á síðasta tímabili náði liðið sínum besta árangri. Kristianstad hafnaði í þriðja sæti sænsku úrvalsdeildarinnar og spilar í Meistaradeildinni í fyrsta sinn á tímabilinu sem framundan er.
„Það er algjör bónus að fá að taka þátt í Meistaradeildinni með Kristianstad en hausinn á mér er alfarið á deildinni þessa stundina," segir Sveindís enda stutt í að deildini hefjist. Kristianstad hefur leik í sænsku úrvalsdeildinni þann 18. apríl gegn Eskilstuna á útivelli.
Sveindís spilar þetta tímabil og fer svo til Wolfsburg í Þýskalandi, eins og áður segir.
„Það verður mjög gaman að fara til Wolfsburg þegar að því kemur og spila við vinkonur mínar þar. En ég verð fyrst og fremst að hugsa um deildina hér í Svíþjóð og standa mig vel hér hjá Kristianstad áður en ég fer eitthvað að pæla í þýsku deildinni."
Hefði viljað lyfta bikarnum fyrir framan fullan Kópavogsvöll
Sveindís varð Íslandsmeistari á síðasta tímabili með Blikum. Undirritaður var forvitinn um það hvort hún myndi vilja breyta einhverju frá síðasta tímabili eða hvort það hefði einfaldlega verið draumur í dós, núna þegar nokkrir mánuðirnir eru liðnir frá því það kláraðist.
„Síðasta tímabil var frábært þrátt fyrir Covid," segir Sveindís og bætir við:
„Ég hefði auðvitað vilja klára tímabilið og fá að lyfta mínum fyrsta Íslandsmeistarabikar fyrir framan fullan Kópavogsvöll en það var bara því miður ekki hægt. En nei, það er ekkert sem ég myndi vilja breyta; ég er bara mjög sátt með síðasta tímabil."
Ekkert betra
Sveindís, sem verður tvítug í sumar, spilaði sína fyrstu A-landsleiki á síðasta ári og hjálpaði Íslandi að komast á EM. Hún er komin með tvö mörk í fimm A-landsleikjum.
„Það er held ég ekkert betra en að klæðast landsliðstreyjunni og spila fyrir Ísland," segir Sveindís en liðið spilar á EM í Englandi á næsta ári. Nýr landsliðsþjálfari er Þorsteinn Halldórsson, sem þjálfaði Sveindísi, hjá Breiðablik.
„Ég er mjög spennt fyrir næstu verkefnum en við ætlum okkur að komast á HM og gera rosalega vel á EM 2022."
Ekki nóg að segja það upphátt og gera ekkert í því
Sveindís talaði um það í viðtali eftir að hún gekk í raðir Wolfsburg að hún ætlaði sér að verða besti leikmaður í heimi. Hvernig nær maður því markmiði?
„Ég á mér stór markmið og lítil en það er ekki nóg að segja þau upphátt og gera svo ekkert í því. Ég verð að standa mig vel og æfa mig í þeim hlutum sem ég get lagað og bætt mig í, til þess að verða með þeim bestu," segir Sveindís.
Árið 2020 var hennar ár en hún segir að 2021 geti orðið enn betra. Þessi efnilegi og eldsnöggi leikmaður vakti mikla athygli hér á Íslandi síðasta sumar og mun eflaust standa sig gríðarlega vel út í hinum stóra heimi næstu árin. Hún er ein af vonarstjörnum Íslands.
Athugasemdir
