| mið 01.maí 2024 16:00 Mynd: Fótbolti.net - Hafliði Breiðfjörð |
|
Spá þjálfara í 2. deild: 4. sæti
Fótbolti.net kynnir liðin sem leika í 2. deild í sumar eitt af öðru eftir því hvar þeim er spáð. Við fengum alla þjálfara liðanna í deildinni til að spá fyrir sumarið og fengu liðin því stig frá 1-11 eftir því en ekki var hægt að spá fyrir sínu eigin liði. Það var gríðarlegt jafnræði á meðal liðanna í öðru til fimmta sæti í spánni en Víkingi Ólafsvík er spáð fjórða sæti.
Víkingar fagna marki eftir síðasta tímabil.
Brynjar Kristmundsson, þjálfari Ólsara.
Gary Martin er mættur í Ólafsvík.
Björn Axel Guðjónsson fagnar marki.
Dani Ndi er með stóra og mikla ferilskrá.
Luke Williams er öflugur.
Hvað gera Ólsarar í sumar?
1.
2.
3.
4. Víkingur Ó. 94 stig
5. Þróttur V., 92 stig
6. Ægir, 78 stig
7. Höttur/Huginn, 56 stig
8. KFG, 54 stig
9. Völsungur, 37 stig
10. Reynir S., 35 stig
11. KF, 27 stig
12. Kormákur/Hvöt, 13 stig
4. Víkingur Ó.
Víkingur Ólafsvík er ótrúlega skemmtilegt félag og það hefur verið frábært að fylgjast með Ólsurum síðustu 20 árin eða svo. Undir stjórn Ejub Purisevic lék Víkingur í efstu deild en það var afar merkilegt afrek þegar litið er til baka. Síðustu ár hafa ekki verið eins frábær og þegar Ejub var með liðið en Ólsarar eru núna á leið inn í sitt þriðja tímabil í röð í 2. deild. Fyrst var niðurstaðan sjöunda sæti, svo fimmta sæti en hvað núna? Taka þeir annað skref fram á við og fara í alvöru baráttu um að komast aftur á þann stað sem þeir vilja að minnsta kosti vera á - í Lengjudeildinni?
Þjálfarinn: Brynjar Kristmundsson tók við stjórn Ólsara af Guðjóni Þórðarsyni eftir tímabilið 2022. Brynjar er fyrrum leikmaður liðsins og hafði verið aðstoðarþjálfari í þrjú ár áður en hann tók við sem aðalþjálfari. Brynjar er uppalinn á Snæfellsnesi og lék sína fyrstu meistaraflokksleiki með Ólsurum árið 2008. Hann fékk góðan skóla hjá Gauja Þórðar og getur klárlega byggt á sínu fyrsta tímabili með liðið - síðasta sumri.
Sjá einnig:
Alltaf með glósubókina á lofti þegar hann vann með Gauja Þórðar
Stóra spurningin: Hvað gerir Gary Martin?
Fyrir stuttu var það tilkynnt að Englendingurinn Gary Martin væri mættur á Ólafsvík eftir að hafa verið í kuldanum á Selfossi. Gary er ekki sami leikmaður og hann var fyrir tíu árum síðan eða fimm árum síðan, en hann enn góður fótboltamaður. Ef hann er upp á sitt besta, þá getur hann verið ansi góður í þessari deild og ætti að geta hjálpað Ólsurum talsvert í baráttunni í efri hlutanum.
Lykilmenn
Björn Axel Guðjónsson: Sóknarmaðurinn var virkilega góður á síðasta tímabili og skoraði þá 13 mörk í 21 leik. Hann þekkir það vel að skora í þessari deild og vonandi fyrir Ólsara verður hann í góðu stuði fyrir framan markið í sumar.
Daniel Arnaud Ndi: Er mættur á Ólafsvík eftir að hafa leikið með Hetti/Hugin síðasta sumar. Þessi 27 ára gamli miðjumaður á ansi áhugaverðan feril að baki en hann á til að mynda leiki með Sporting Gijon í spænsku úrvalsdeildinni. Hann hafði verið að leika í neðri deildunum á Spáni áður en hann kom til Íslands. Ndi á fimm A-landsleiki að baki fyrir Kamerún en það gerist ekki á hverjum degi að leikmaður með svona feril komi til Íslands, hvað þá í 2. deild. Hann kom til landsins í gegnum umboðsmanninn Nacho Poveda sem spilaði með Hetti/Hugin sumarið 2021.
Luke Williams: Reyndur miðjumaður sem er á leið inn í sitt þriðja tímabil með Ólsurum. Hann ólst upp hjá Middlesbrough og steig sín fyrstu skref þar. Hann byrjaði sem táningur að spila með liðinu í Championship-deildinni, næst efstu deild Englands. Hann spilaði alls 34 leiki með Middlesbrough í Championship. Hann spilaði svo með Hartlepool, Scunthorpe, Coventry, Peterborough, Northampton og Gateshead en leikur núna listir sínar á Ólafsvík.
Komnir:
Daniel Arnaud Ndi frá Hetti/Hugin
Eyþór Örn Eyþórsson frá Val (á láni)
Gabriel Þór Þórðarson frá ÍA (á láni)
Gary Martin frá Selfossi (á láni)
Ivan Rodrigo Moran Blanco frá KFA
Luis Alberto Diez Ocerin frá Ítalíu
Ómar Castaldo Einarsson frá Þór
Stefán Óli Hallgrímsson frá Völsungi
Farnir:
Abdelhadi Khalok El Bouzarrari í KFA
Carlos Casanovas Ruiz til Spánar
Guðbjörn Smári Birgisson í Hvíta riddarann
Gunnar Bragi Jónasson í Skallagrím
Ingólfur Sigurðsson í KH
Ísak Máni Guðjónsson í ÍA
Mikael Hrafn Helgason í Kára
Þjálfarinn segir - Brynjar Kristmundsson
„Sumarið leggst mjög vel í okkur Ólafsvíkinga og erum við ótrúlega spenntir að byrja. Ég held að við séum svona eitt af átta liðum sem stefnir að því að fara upp úr þessari deild sem gerir þessa deild mjög svo áhugaverða. Fjórða sætið væri skref fram á við frá því í fyrra en við viljum miklu meira en það."
Fyrstu þrír leikir Víkinga:
4. maí, Víkingur Ó. - Völsungur (Ólafsvíkurvöllur)
11. maí, KFA - Víkingur Ó. (Fjarðabyggðarhöllin)
18. maí, Víkingur Ó. - Þróttur V. (Ólafsvíkurvöllur)
Athugasemdir
