Skoraði ellefu mörk í Lengjudeildinni.
Fékk tækifæri og traust undir stjórn Venna til að spila framar.
Hinrik Harðarson og Kári eru æskuvinir og léku saman hjá Þrótti.
Kári Kristjánsson, leikmaður Þróttar, hefur verið orðaður í burtu frá félaginu og hefur verið fjallað um tilboð frá bæði Val og ÍA í leikmanninn. Kári, sem er uppalinn Þróttari, skoraði ellefu mörk í Lengjudeildinni í sumar og var valinn í lið ársins í deildinni.
Í lok síðasta mánaðar fjallaði Fótbolti.net um Valur hefði lagt fram tilboð í Kára og það væri ekki fyrsta tilboðið í leikmanninn. Síðan eru liðnar tvær vikur og lítið heyrst. Fótbolti.net ræddi við Kára í dag.
Í lok síðasta mánaðar fjallaði Fótbolti.net um Valur hefði lagt fram tilboð í Kára og það væri ekki fyrsta tilboðið í leikmanninn. Síðan eru liðnar tvær vikur og lítið heyrst. Fótbolti.net ræddi við Kára í dag.
„Það er bara jákvætt að heyra af tilboðum í mig og er góð viðurkenning á frammistöðuna mína með Þrótti í sumar. Það hefur samt verið mikilvægt að einbeita sér að verkefninu í Þrótti á meðan þetta hefur verið í gangi og nýta sem kraft til að reyna gera enn betur," segir Kári.
„Að sjálfsögðu er skemmtilegt að vita af áhuga úr efstu deild, það sýnir mér að fleiri en ég sjálfur hafa trú á að ég geti spilað í efstu deild með bestu liðum landsins. Vonandi verður það að veruleika á næstu árum að ég geti mátað mig við þá bestu."
Fjallað hefur verið um áhuga Vals og ÍA, finnst þér það heillandi félög?
„Að sjálfsögðu, tvö af stærstu liðum landsins og enduðu bæði í efri hlutanum í sumar. Ég sakna náttúrulega mikið að spila með æskuvini mínum Hinriki en ég held að við munum spila saman aftur á einhverjum tímapunkti. En á meðan þessar viðræður eru bara milli félagana er lítið sem ég þarf að pæla í varðandi þessi félög annað en leikirnir sem við eigum við þau bæði eftir áramót."
Þróttur er með Val, ÍA, Grindavík, Vestra og Fjölni í riðli í Lengjubikarnum. Þróttur mætir Val í febrúar og ÍA í mars.
Kári skoraði eitt mark í Lengjudeildinni 2023 en ellefu mörk í sumar. Hvað gerðist milli ára?
„Eftir að Lengjudeildin kláraðist 2023 spilaði ég nokkra leiki með 2. flokki þar sem Örn Þór þjálfari gaf mér meira frjálsræði og ég náði að skora nokkur mörk. Það svo hélt áfram undir stjórn Venna í meistaraflokknum, hann gaf mer tækifæri og traust til að spila aðeins ofar og það hefur gengið betur en ég hélt," segir Kári sem spilar oftast sem fremsti maður á miðju í 3-4-3 leikkerfi Þróttara.
Hvernig sérðu þína framtíð? Hvað langar þig að gerist í vetur?
„Mig langar að ná árangri, vinna titla og komast eins og langt og hægt er, en mig langar líka að Þróttur nái góðum árangri og geri sig gildandi í íslenskum fótbolta. Eins og er get ég unnið að þessu báðu á sama tíma sem er frábært og hefur verið draumur frá því ég var lítill."
„Stundum þarf samt að taka tilfinningarnar til hliðar og hugsa um sjálfan sig en ég hef ekki ennþá þurft að taka neina ákvörðun með framhaldið. Aðalmarkmiðið í dag er að ég verði klár í maí að leggja mitt að mörkum svo að Þróttur geti keppt um að fara upp í Bestu deildina á næsta ári," segir hinn tvítugi Kári.
Athugasemdir
