Tveggja leikja bann fyrir að kýla í pung á Dalvík

Amin Guerrero hjá Dalvík/Reyni hefur verið dæmdur í tveggja leikja bann af aganefnd KSÍ en hann kýldi Gunnlaug Fannar Guðmundsson leikmann Keflavíkur í punginn þegar liðin áttust við á Dalvík á laugardaginn.

Guerrero fékk að líta rauða spjaldið og hefur nú verið dæmdur í tveggja leikja bann svo hann missir af komandi leikjum gegn Grindavík og Þór í Lengjudeildinni.

„Hann kýlir mig bara í punginn og á að fá rautt spjald. Svo fæ ég gult út af því að dómarinn er svo lengi að átta sig á hlutunum, línuvörðurinn á að flagga strax og þá hefði ég aldrei fengið gult spjald," sagði Gunnlaugur eftir leikinn.

„Það er smá kítingur sem gerist í fótbolta en ég bjóst aldrei við króknum. Ég var ennþá að drepast í seinni hálfleik, ég var með verk alveg upp í geirvörtur."

Guerrero er spænskur vængmaður sem gekk í raðir Dalvíkur/Reynis fyrir tímabilið. Hann fékk rautt seint í fyrri hálfleik en Keflavík náði ekki að nýta sér liðsmuninn og leikurinn endaði með markalausu jafntefli.