Ræddu um áhuga Man Utd á Hákoni - Sögulegt ef það raungerist

Hákon er stuðningsmaður Man Utd en það gæti farið svo að hann verði fyrsti íslenski leikmaður í sögu félagsins.

„Ég ætla að vona það að hann fari ekki að eyðileggja ferilinn sinn snemma," sagði Magnús Haukur Harðarson, stuðningsmaður Liverpool, léttur í þættinum þegar rætt var um áhuga United á Hákoni en það hefur ekki gengið vel hjá Man Utd undanfarin ár.

„Hann var ógeðslega góður á Anfield og sýndi hvar hann er staddur í sinni vegferð," sagði Magnús.

Hákon er leikmaður sem myndi þó örugglega henta vel inn í það leikkerfi sem Rúben Amorim er að spila með United, þetta 3-4-3 kerfi sem hann er að vinna með.

„Hann myndi 100 prósent passa inn í þetta kerfi en málið er það að hann einn er ekki að fara að leysa þessi 8000 vandamál sem eru í gangi á Old Trafford. Það er stóra málið í þessu. Hann hefði engan senter til að gefa á og lélega vængbakverði til að spila með. Það virðist ekkert ganga upp sem gerist þarna," sagði Baldvin Már Borgarsson.

Baldvin býst við Hákon fari frá Lille í síðasta lagi í sumar, en það er bara spurning hvert.

„Hann er búinn að vera stórkostlegur í síðustu leikjum. Var mjög góður á Anfield eins og Maggi kom inn á," sagði Baldvin.

„Ég held að Hákon verði líklega topp fimm leikmaður í sögu Íslands. Auðvitað snýst það líka um meiðsli. Vonandi meiðist hann ekki mikið oftar. Eiður Smári og Ásgeir Sigurvins eiga bestu ferla Íslendinga. Hákon er á leiðinni þangað, það er alveg klárt mál," sagði Magnús.

„Það verður virkilega gaman að sjá hvernig ferill hans mun þróast og hvort hann verði fyrsti Íslendingurinn í sögu Manchester United. Það væri risastórt og fyrir mig sem Man Utd mann, væri það ógeðslega gaman," sagði Guðmundur Aðalsteinn Ásgeirsson í þættinum sem hægt er að hlusta á í heild sinni hér fyrir neðan.