„Vonbrigði, við vorum lang næst bestir í dag. Afturelding var töluvert betri en við. Mér fannst við reyndar ágætir fyrstu tuttugu mínúturnar en þeir voru klókir, ýttu okkur úr okkar leik, við réðum illa við fremstu tvo mennina hjá þeim. Sanngjarnt tap" sagði Heimir Guðjónsson, þjálfari Fylkis eftir 5-1 tap á úti velli gegn Aftureldingu.
Lestu um leikinn: Afturelding 5 - 1 Fylkir
Var frammistaðan léleg?
„Já, hún var ekki góð, fyrir utan fyrstu tuttugu mínúturnar. En Afturelding er með mjög gott lið og þeir refsuðu okkur, tvö mörk úr föstum leikatriðum. Við vorum ólíkir sjálfum okkur, en á móti kemur er þetta einn leikur og við þurfum að setjast niður og læra af þessu og koma sterkari til baka."
Þetta var ekki Fylkis frammistaðan sem við höfum séð hingað til?
„Nei, það fannst mér ekki. Mér finnst við hafa spilað vel síðan þetta mót byrjaði, aldrei gott að tapa en eins og ég sagði áðan við verðum að snúa bökunum saman og verða klárir í næsta leik. Erfiður leikur á móti Þrótti sem eru að mínu mati besta liðið í deildinni."
Missiði haus eftir fyrsta mark Aftureldingar?
„Nei, þeir gengu á lagið. Fengu sjálfstraust eftir að þeir skoruðu fyrsta markið, við kannski kóðnuðum aðeins niður. Mér fannst þeir góðir eftir markið, það var fjögur núll í hálfleik og leikurinn nánast búinn."
