Chelsea er komið í undanúrslit enska bikarsins eftir að hafa rétt marið Sheffield United í 8-liða úrslitum.

Búist var við að Chelsea myndi vinna þennan leik auðveldlega en sú varð raunin ekki. Chelsea tók forystuna þegar fast skot Ben Chilwell fór af Oliver Norwood og í netið um miðbik fyrri hálfleiks.

Chelsea var betra liðið í fyrri hálfleik en tókst ekki að koma sér í færi. Gestirnir frá Sheffield vöknuðu til lífsins eftir leikhlé og tóku að sækja.

Sheffield, sem er langneðsta lið ensku úrvalsdeildarinnar, sýndi frábæra takta í síðari hálfleik en ekki tókst þó að jafna.

Það ríkti mikil spenna í loftinu á lokakaflanum en Hakim Ziyech kláraði leikinn fyrir Chelsea í uppbótartíma.

Chelsea er þá komið í undanúrslit ásamt Manchester City og Southampton.